इराकको एयरबेसमा इरान समर्थित लडाकुको आक्रमण, केही अमेरिकी सैनिक घाइते

पश्चिमी इराकको एक एयरबेसमा इरान समर्थित लडाकुहरूले गरेको मिसाइल आक्रमणमा परी केही अमेरिकी सैनिक घाइते भएका छन् । अमेरिकी सेनाको केन्द्रीय कमाण्डले शनिबार साँझ लडाकुहरूले इराकको अल असद एयरबेसलाई ब्यालेस्टिक मिसाइल र रकेटले निशाना बनाएको बताएको छ।
हमलापछि केही अमेरिकी सैनिक घाइते भएको बीबीसीले जनाएको छ । आक्रमणमा इराकी सेनाका कम्तीमा एक सदस्य पनि घाइते भएका छन् ।

‘इस्लामिक रेजिस्टेन्स इन इराक’ नामक संगठनले अल असद एयरबेसलाई निशाना बनाएको जिम्मेवारी लिएको छ ।

अमेरिकी सेनाले शनिबार प्रहार गरिएका अधिकांश क्षेप्यास्त्रहरू रोकिएको बताएको छ ।  

गत वर्ष अक्टोबरमा इजरायल र गाजाबीच युद्ध सुरु भएपछि इराक र सिरियामा रहेको अमेरिकी अड्डाहरूमा इरानसँग सम्बन्धित संगठनहरूले गरेको यो पछिल्लो आक्रमण हो ।

खबरपाटी