फेरि जनयुद्धकै जस्तो ऊर्जा र उत्प्रेरणा लिएर अघि बढ्छौं : प्रचण्ड

काठमाडौं । नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ ले ३१औँ जनयुद्ध दिवसका अवसरमा सशस्त्र क्रान्तिको उद्गमस्थल रुकुम पूर्वबाट समाजवादको नयाँ यात्रा सुरु गर्ने संकल्प गरेका छन् । जनयुद्ध सुरु भएको ठीक ३० वर्ष पूरा भएको ऐतिहासिक घडीमा बिहीबार रुकुम पूर्व पुगेका उनले यहाँका जनताको उत्प्रेरणाबाट आफूले नयाँ ऊर्जा प्राप्त गरेको बताएका हुन् ।

सशस्त्र युद्धको स्मृति ताजा गर्दै आयोजित विशेष समारोहलाई सम्बोधन गर्दै प्रचण्डले संघीय लोकतान्त्रिक गणतन्त्र स्थापनामा गरिब, महिला तथा आदिवासी जनजातिको योगदान निर्णायक रहेको उल्लेख गरे । ‘यहाँका गरिब, महिला र आदिवासी जनजातिले रगत नबगाएको भए हामी आज समावेशी र समानुपातिक गणतन्त्रमा हुने थिएनौँ,’ उनले भने, ‘यस वर्षको जनयुद्ध दिवस मेरो लागि विशेष छ । रुकुम पूर्वमा आउँदा म उद्वेलित भएको छु, जनयुद्धकै जस्तो दृढता र नयाँ ऊर्जासहित अब समाजवादको यात्रामा अघि बढ्नेछौँ ।’

मुलुकको वर्तमान परिस्थिति चुनौतीपूर्ण रहेको चर्चा गर्दै प्रचण्डले २०८४ सालमा हुनुपर्ने निर्वाचन २०८२ मै गर्नुपर्ने अवस्था सिर्जना हुनुले देश कठिन मोडमा रहेको संकेत गरेको बताए । उनले यस्तो संकटको घडीमा जनयुद्धकालीन प्रेरणाबाट शिक्षा लिँदै राष्ट्र र राष्ट्रियताको पक्षमा उभिनुपर्नेमा जोड दिए । उनले नेपाली जनताको आत्मनिर्णयको अधिकार रक्षाका लागि नयाँ अभियान सञ्चालन गर्ने उद्घोष समेत गरे ।

१० वर्षसम्म चलेको सशस्त्र युद्धको स्मरणमा नेकपाले रुकुम पूर्वको भूमे गाउँपालिका-२, खाबाङ बगरमा विशेष कार्यक्रम आयोजना गरेको छ । सो अवसरमा प्रचण्डले २ सय ५२ शहीद परिवारलाई सम्मान गर्ने कार्यक्रम छ । संघीयतापछि बनेको ‘कान्छो जिल्ला’ रुकुम पूर्वबाटै प्रचण्ड आगामी २१ फागुनमा हुने प्रतिनिधि सभा सदस्य निर्वाचनका लागि उम्मेदवार समेत छन् ।

बन्दुकदेखि ब्यालेटसम्मको साक्षी : रुकुमको इतिहास
तत्कालीन नेकपा (माओवादी) ले २०५२ साल फागुन १ गते रुकुमको आठबीसकोट, रोल्पाको होलरी, सिन्धुलीगढी र गोरखाको च्याङ्लीमा आक्रमण गर्दै युद्धको सुरुवात गरेको थियो । रुकुम र रोल्पालाई आधार इलाका बनाएर अघि बढेको सो युद्धका क्रममा २०५३ वैशाख २३ मा रुकुम पूर्वको छेरावाङमा पहिलो पटक एम्बुसमा परी एक प्रहरीको ज्यान गएको थियो ।

२०५६ असोज ५ मा महत प्रहरी चौकी आक्रमण गरी तत्कालीन डीएसपी ठूले राईलाई नियन्त्रणमा लिएको र पछि नेता देव गुरुङसँग साटफेर गरिएको ऐतिहासिक सन्दर्भ पनि रुकुमसँगै जोडिएको छ । प्रचण्डले आजै महतगाउँ र लावाङको भ्रमण गर्ने तालिका छ । २०६१ माघमा लावाङमा बसेको बैठकले डा. बाबुराम भट्टराईमाथि कारबाही गर्ने निर्णय गरेको थियो भने २०६२ असोजमा चुनवाङमा बसेको बैठकले ‘लोकतान्त्रिक गणतन्त्र’ को कार्यदिशा पारित गर्दै शान्तिपूर्ण राजनीतिको मार्ग प्रशस्त गरेको थियो ।

खबरपाटी