खुल्लम खुल्ला संसद भवन जलाउने व्यक्ती नै रास्वपाबाट सांसदको उम्मेद्वार

जेन–जी आन्दोलनका क्रममा संसद भवनमा आगो लगाउने व्यक्तिलाई राष्ट्रिय स्वतन्त्र पार्टी (रास्वपा)ले उम्मेदवार बनाएको छ । मोरङ–२ का उम्मेदवार कृष्णकुमार कार्की २४ भदौमा संसद भवन जलाउँदै गरेको दृश्य उनकै सामाजिक सञ्जालमा देख्न सकिन्छ । 

मोरङको रतुवामाई नगरपालिका–९ का स्थानीय कार्की भर्खरै वैदेशिक रोजगारीबाट फर्किएका हुन् । उनीनिकटका अनुसार कार्की जेन–जी आन्दोलनको केही दिनअगाडि मात्र नेपाल फर्किएका थिए । तर, अकस्मात् २४ भदौमा भएको आगलागीमा उनको तस्वीर र भिडियो टिकटकमा फैलियो । उनी आफैँले समेत उक्त दृश्य फेसबुकमा राखेको भेटिएको छ ।

उक्त दृश्यमा कार्कीले आफ्ना समर्थकसहित बानेश्वरस्थित संसद भवन पुगेर आगो लगाउन सघाएको देखिएको छ । उनी उक्त घटनामा सक्रियतापूर्वक लागेको दृश्यले पुष्टि गर्छ । कार्कीले आफैँ तोडफोड र आगजनीमा संलग्न भएको स्वीकार गरेका छन् । तर, संसद भवनको कुर्सी मात्र आफूले जलाएको भन्दै उनले भवन भने घुसपैठियाले जलाएको जिकिर गरेका छन् ।

उनले राजनीतिक दलका नेताहरूको घरमा गरिएको विध्वंस भनेमा आफ्नो संलग्नता रहेको लेखेका छन् । बालाजुदेखि सोह्रखुट्टे, ठमेल, दरबारमार्ग, रानीपोखरी, सिंहदरबारहुँदै नेताहरूको घरमा पुगेर आगजनी गरेको उनले स्वीकार गरेका छन् ।

अघिल्लो निर्वाचनमा रास्वपाले यस क्षेत्रमा ठगेन्द्र न्यौपानेलाई उम्मेदवार बनाएको थियो । यसपटक उनको चर्चा भए पनि टिकट भने कार्कीले पाए । कार्की १२ वर्ष जापान बसेर फर्किएको बताइएको छ । उनका सोसल मिडिया पोस्ट हेर्दा सुरुवातमा रवि लामिछानेलाई ‘सहकारी ठग’ भनेर लेख्दै आएको पनि देखिन्छ ।

खबरपाटी