पाकिस्तान चुनाव : नवाज शरीफले भने- मिलेर सरकार बनाउन तयार छौँ

इस्लामाबाद । पाकिस्तानमा बिहीबार ८ फेब्रुअरीमा भएको आम निर्वाचनको मतगणना जारी छ । पछिल्लो मतपरिणाम अनुसार इमरान खानको पार्टी पाकिस्तान तेहरिक-ए-इन्साफले समर्थन गरेका उम्मेदवारले २६६ सदस्यीय नेसनल एसेम्बलीमा ८३ सिट जितेका छन्।

योसँगै नवाज सरिफको नेतृत्वमा रहेको पाकिस्तान मुस्लिम लिग–नवाजले ६५ सिट जितेको छ । त्यस्तै पाकिस्तान पिपुल्स पार्टीले करिब ४२ सिट जितेको छ । इमरान खानले समर्थन गरेका अधिकांश उम्मेदवारहरू खैबर-पख्तुनख्वाका हुन्।  सबैभन्दा धेरै जनसङ्ख्या भएको राज्य पञ्जाबमा नतिजा आउन जारी छ।

लाहोरको एनए-१३० सिटबाट ठुलो मतान्तरले चुनाव जितेका नवाज शरीफले शुक्रबार साँझ आफ्नो पार्टी कार्यकर्ताहरूलाई सम्बोधन गरे। समाचार एजेन्सी रोयटर्सका अनुसार नवाज शरीफले आफ्नो पार्टीले यस चुनावमा सबैभन्दा बढी मत प्राप्त गरेको दाबी गरेका छन् ।

नले आफ्नो पार्टीले कति सिट जितेका छन् भन्ने खुलाएका छैनन् । तर निर्वाचन आयोगका अनुसार उनको पार्टीले ६५ सिट प्राप्त गरेको छ जुन १३३ को बहुमतको आँकडाभन्दा निकै कम हो ।

उनले आफ्नो पार्टीसँग आफ्नै बलमा सरकार बनाउनका लागि पर्याप्त सिट नरहेको समेत बताए । त्यसैले शहबाज सरिफलगायत उनको पार्टीका नेताहरूले पीपीपीका आसिफ अली जरदारी र एमक्यूएमलगायत अन्य दलका नेताहरूसँग भेट गर्नेछन्।

खबरपाटी