विश्व वातावरण दिवसमा नेपालभर ८०,००० बालबालिकाले रुख रोप्ने

काठमाडौं-विश्व वातावरण दिवस (जुन ५) को अवसरमा वर्ल्ड भिजन इन्टरनेशनल नेपाल (WVI Nepal) ले "एक बच्चा, एक रुख" (One Child, One Tree) नामक राष्ट्रव्यापी अभियान सञ्चालन गर्दैछ। यस अभियानअन्तर्गत नेपालभरका करिब ८०,००० बालबालिकाले आफ्नो घर र समुदायमा रुख रोप्नेछन्, जसको मुख्य उद्देश्य भविष्यको पुस्तालाई जलवायु परिवर्तनको प्रतिकूल असरबाट जोगाउनु हो।

नेपाल सरकारले यस वर्षको विश्व वातावरण दिवसको मूल नारा "समृद्ध भविष्यको आधारः जलवायु एवम् प्रकृतिमैत्री विकास" अर्थात् "Inspired by Nature. For Climate. For Our Future." राखेको छ। 

सोही भावनाअनुरूप वर्ल्ड भिजन इन्टरनेशनल नेपालले यो अभियान सुरु गरेको हो। संस्थाको विश्वास छ कि बालबालिका परिवर्तनका सक्रिय वाहक हुन् र उनीहरूले आफ्नै भविष्य सुरक्षित गर्न सक्छन्।
यस अभियानमा बालबालिकाका साथसाथै उनीहरूका परिवार, शिक्षक, स्थानीय सरकार र सामुदायिक वन उपभोक्ता समूहहरू पनि सहभागी हुनेछन्। रुख रोपाइँ नेपालका पहाड, हिमाल र तराई तीनै भौगोलिक क्षेत्रमा गरिनेछ। रोपिने रुखका प्रजाति स्थानीय सरकार र जिल्ला वन कार्यालयको समन्वयमा सावधानीपूर्वक छनोट गरिएका छन्, ताकि प्रत्येक क्षेत्रको पारिस्थितिक सन्तुलन कायम रहोस्। विशेषगरी फलफूल दिने रुखहरूलाई प्राथमिकता दिइएको छ, जसले नेपालका बालबालिकामा व्याप्त कुपोषणको समस्यालाई पनि सम्बोधन गर्न मद्दत गर्नेछ।
वर्ल्ड भिजन इन्टरनेशनल नेपालका प्राविधिक कार्यक्रम (रेजिलियन्स तथा जीविकोपार्जन) एसोसिएट डाइरेक्टर प्रकाश तिवारीले भने, "यो अभियान बालबालिकालाई प्रकृतिप्रति माया र जिम्मेवारी सिकाउने अभियान हो। एउटा रुख रोपेर प्रत्येक बच्चाले हरियो र जलवायु-सहनशील नेपाल निर्माणमा आफ्नो योगदान पुर्‍याउँछ।"
अभियानअन्तर्गत प्रत्येक रोपिएको रुखसँगै "My Tree Card" नामक एक व्यक्तिगत कार्ड दिइनेछ, जसमा रुखको महत्त्व र दीर्घकालीन स्याहारसम्भारबारे जानकारी उल्लेख हुनेछ। यसले बालबालिकामा रुखप्रति स्वामित्वको भावना जगाउने अपेक्षा गरिएको छ। साथै, फिल्ड टोली र शिक्षकहरूले रोपाइँपछि तीन महिना र छ महिनामा रुखको अवस्थाको अनुगमन गर्नेछन्, जसले रुखको अधिकतम जीवित दर सुनिश्चित गर्नेछ।यस अभियानमार्फत कम्तीमा १०० वटा विद्यालय र सामुदायिक समूह सहभागी हुने अपेक्षा गरिएको छ। बालबालिका, परिवार, समुदाय र सरकारबीचको यो साझेदारीले नेपालको वातावरण संरक्षणमा दीर्घकालीन प्रभाव पार्ने वर्ल्ड भिजनको विश्वास छ।
वर्ल्ड भिजन इन्टरनेशनल नेपालले जलवायु परिवर्तनका बढ्दा चुनौतीबीच बालबालिकामा आशाको किरण जगाउँदै समुदायसँगै प्राकृतिक स्रोतको पुनःस्थापना र हरियाली नेपाल निर्माणको प्रतिबद्धता व्यक्त गरेको छ।

खबरपाटी