२०२५ काे स्पष्ट सन्देश, "जनता सरकारभन्दा ठूला हुन्छन्"

प्रस्तुत काेइराला । काठमाडाैँ । सन् २०२५ नेपालको इतिहासमा एउटा यस्तो वर्ष हाे जसले पुरानो व्यवस्थालाई चुनौती दियो र नयाँ पुस्तालाई आवाज । यो वर्ष शान्त थिएन, निदाएको वर्ष नि थिएन। सडकमा युवाहरूको खुट्टाको धुलो उड्यो, सामाजिक सञ्जालमा आक्रोशका अक्षरहरू पोखिए, र संसद्भित्रका कुर्सीहरू हल्लिए । २०२५ ले नेपाललाई एउटा स्पष्ट सन्देश दियो जनता सरकारभन्दा ठूला हुन्छन्।

यो वर्ष राजनीतिक अस्थिरताको पराकाष्ठा बन्यो। फेरि एकपटक गठबन्धन बने, भत्किए र नयाँ समीकरण खोजिए। प्रधानमन्त्रीको कुर्सीमा बसेकाहरूले विश्वासको मत जोगाउन रातबिरात छलफल गरे, तर जनताको विश्वास जोगाउन सकेनन्। संविधान संशोधनको कुरा उठ्यो, संघीयताको कार्यान्वयनमा प्रदेशहरूले केन्द्रसँग झगडा गरे, सुशासनको नारा लगाइयो तर भ्रष्टाचारका फाइलहरू उस्तै थुप्रिए। दलहरू चुनावी हिसाबकिताबमा व्यस्त रहँदा जनताको धैर्यता टुट्यो।

यही खाली ठाउँमा जेन्जी पुस्ता उभियो। उनीहरू किताब बोकेर होइन, मोबाइल बोकेर सडकमा आए। शिक्षा सुधारको माग गर्दै सुरु भएको आन्दोलन चाँडै रोजगारी, अभिव्यक्ति स्वतन्त्रता र भ्रष्टाचारविरोधी विद्रोहमा बदलियो। काठमाडौंको माइतीघर मण्डलादेखि विराटनगरको ट्राफिक चोकसम्म एउटै नारा गुञ्जियो “हाम्रो भविष्य फिर्ता गर।” प्रहरीको लाठी र पानीको फोहराले उनीहरूलाई रोक्न सकेन। सामाजिक सञ्जाल बने उनीहरूको सबैभन्दा ठूलो हतियार। #ChangeNepal, #YouthForJustice जस्ता ह्यासट्यागहरूले लाखौंलाई जोड्यो र राजनीतिक दलहरूलाई लाजमात्र होइन, डर पनि लाग्यो।

समाजले पनि यो वर्ष नयाँ रंग देख्यो। महिला हिंसाविरुद्धको आवाज पहिलेभन्दा चर्को भयो। कार्यस्थलमा दुव्र्यवहार भएका कथाहरू खुलेआम बाहिर आए, दोषीहरूले सामाजिक बहिष्कारको सामना गरे। जातीय विभेद र छुवाछूतका घटनाहरूले तराईदेखि हिमालसम्म आन्दोलन भड्काए। पत्रकारहरूमाथि भएको दमन र अभिव्यक्ति स्वतन्त्रतामाथिको आक्रमणले डिजिटल प्लेटफर्महरूलाई प्रतिरोधको मुख्य थलो बनायो। TikTok का छोटा भिडियोदेखि X का लामा थ्रेडसम्म सबैतिर एउटै प्रश्न थियो : हामी कसरी यो व्यवस्थाभित्र बाँचिरहेका छौं?

२०२५ ले नेपाललाई ऐनामा हेर्न बाध्य बनायो। राजनीति थकित देखियो, समाज बेचैन भयो, र युवाहरूले अब चुप लागेर बस्ने दिन गए भन्ने सन्देश दिए। यो वर्ष दुःखको थियो, तर झूटो थिएन। यसले पुरानो पुस्तालाई एउटा प्रश्न सोध्यो तपाईंहरूले हामीलाई के छोडेर जाँदै हुनुहुन्छ? र नयाँ पुस्तालाई एउटा जिम्मेवारी दियो अब परिवर्तन हाम्रै हातमा छ।

इतिहासले यस्तै वर्षहरूलाई सम्झिन्छ जसले डरलाई हिम्मतमा बदलिदिन्छ। २०२५ त्यस्तै वर्ष बन्यो। अब आउने दिनहरूले यो हिम्मतलाई फल दिनेछन् कि फेरि निराशामा बदलिनेछन्, त्यो हेर्न बाँकी छ। तर एउटा कुरा पक्का छ नेपाल अब पहिलेजस्तो रहने छैन।

खबरपाटी