एउटै कार्यकालमा तीनचोटि विश्वासको मत लिँदै कर्णालीका मुख्यमन्त्री, सभामुख नयाँ चयन गरिने

काठमाडौं । एउटै कार्यकालमा तीनचोटि विश्वासको मत लिएर कर्णाली प्रदेशका मुख्यमन्त्री राजकुमार शर्माले कीर्तिमान राख्ने भएका छन् । यसअघि माघ ६ र चैत १७ गते प्रदेश सभाबाट विश्वासको मत लिएका शर्माले चाँडै तेस्रोपटक विश्वासको मत लिने भएका छन् ।

एमालेले सरकारबाट बहिरिएसँगै समर्थनसमेत फिर्ता लिएकाले मुख्यमन्त्री शर्माले तेस्रोपटक प्रदेशसभाबाट विश्वासको मत लिनु पर्ने भएको हो । केन्द्रमा फेरिएको समीकरणअनुसार एमालेले सरकारमा बस्न नसक्ने जनाउँदै तीन दिनअघि सरकारलाई दिएको समर्थन फिर्ता लिँदै मन्त्रीहरूले राजीनामा दिएका थिए ।

केन्द्रीय सत्ता साझेदार दलहरुबीच नै समीकरण गरी नेपाली कांग्रेसलाई सरकारमा ल्याउने तयारीसमेत गरिएको माओवादीले जनाएको छ । कांग्रेसलाई एमालेलाई दिएका तीन मन्त्रालयमा चित्त बुझाउने गरी बाँडफाँड गर्ने तयारी छ । कर्णाली प्रदेशमा नेपाली कांग्रेस ठूलो दल भएकाले नेतृत्व नै दाबी गरेको छ । ठूलो दलको हैसियतमा कि नेतृत्व दिनुपर्ने कि मन्त्रालय बढाउनुपर्ने गरी छलफल गर्ने कांग्रेसले जनाएको छ ।

कांग्रेस, माओवादी, एकीकृत समाजवादी र स्वतन्त्र गरी प्रदेशसभामा दुई तिहाइ पुग्ने भएकाले कर्णाली प्रदेशमा सभामुख पनि परिवर्तन हुने सम्भावना धेरै छ । अहिले एमालेकी नन्दा गुरुङ कर्णाली प्रदेशको सभामुख छिन् । कांग्रेसले सभामुख आफूले लिने गरी सरकारमा जाने रणनीति बनाएको छ ।