रसुवा–नुवाकोट बाढीपीडितको साथमा वर्ल्ड भिजन: एक महिनामै ८,६८४ जनासम्म पुग्यो राहत

टिमुरे, रसुवागढी, स्याब्रुबेसी, त्रिशूली बजार, बेत्रावती र सोलेजस्ता बस्ती सबैभन्दा बढी प्रभावित भएका छन्। घर, बजार, सीमा व्यापार सुविधा, जलविद्युत् आयोजना र प्रसारण संरचना बगाएको छ। ४५ वटा झोलुङ्गे पुल र ३५ वटा सडक पुल भत्किँदा दुर्गम बस्तीसम्मको पहुँच नै कटेको छ।

राहतको सुखद पक्षतर्फ, धादिङ र नुवाकोटमा बेत्रावतीका केही घरधुरी बाहेक विद्युत् आपूर्ति पुनःस्थापना भएको छ। रसुवामा करिब ९० प्रतिशत घरधुरीमा बिजुली फर्किसकेको र ढिलो पुग्ने ठाउँमा सौर्य प्रणालीलगायत वैकल्पिक ऊर्जा वितरण गरिँदै छ। तर प्रभावित जिल्लाहरूमा इन्धनको उपलब्धता सीमित रहेकाले आवागमनको योजना बनाउँदा मौज्दात हेरेर अघि बढ्न आग्रह गरिएको छ।

एक महिनामा के–के पुग्यो?

संस्थाका अनुसार पहिलो चरणमा खाद्यान्न, आश्रय, सरसफाइ र संरक्षणका सामग्री तत्काल वितरण गरिएको छ:

यसबाहेक, ११० केभीएका २ वटा स्टेबिलाइजर जडान गरिएको छ, जसले करिब २५,००० जना (१०,००० बालबालिकासहित) लाई सुरक्षित खानेपानीमा सहयोग पुर्‍याउने संस्थाको दाबी छ। रसुवाको उत्तरगया र गोसाइँकुण्ड गाउँपालिकामा १ स्वास्थ्य चौकी, १ वडा कार्यालय र २ वटा पालिका कार्यालयगरी ४ संस्थालाई कार्यालय उपकरण उपलब्ध गराइएपछि आवश्यक सेवा पुनः सुचारु हुने आधार बनेको छ। विस्थापित भएर आश्रय केन्द्रमा बसेकाहरूको विस्तृत तथ्यांक सङ्कलनमा स्थानीय सरकारलाई सघाउन ३ जना स्वयंसेवक परिचालन गरिएको छ।

अब के? राहतदेखि पुनर्स्थापनासम्म एक वर्षे योजना

वर्ल्ड भिजन नेपालले प्रतिक्रिया अवधि एक वर्ष तोकेको छ र रसुवा तथा नुवाकोटमा केन्द्रित भएर काम गर्ने जनाएको छ। पहिलो चरण ‘राहत’ मा २५,००० जना (१०,००० बालबालिकासहित) र करिब ५,००० घरधुरीलाई आपत्कालीन खाद्यान्न, आश्रय किट, हाइजिन किट, महिला तथा किशोरीका लागि डिग्निटी किट र मनोसामाजिक सहयोग पुर्‍याउने लक्ष्य छ। दोस्रो चरण ‘पुनःप्राप्ति तथा पुनर्स्थापना’ मा २०,००० जना (८,००० बालबालिकासहित) लाई आश्रय, जीविकोपार्जन र खानेपानी–सरसफाइमा सहयोग गरिनेछ। बालबालिकाको पढाइ पुनः सुरु गराउँदै उनीहरूलाई सामान्य जीवनतर्फ फर्काउने तथा संरक्षण र स्वास्थ्य सेवामा पहुँच सुनिश्चित गर्ने योजना पनि यसमा समेटिएको छ।

संस्थाले खाद्य, खानेपानी–सरसफाइ, आश्रय, शिक्षा, बाल संरक्षण र स्वास्थ्य तथा पोषण गरी छ वटा क्षेत्रमा काम गर्ने जनाएको छ। अझै २०,००० घरधुरीलाई खाद्य सहायता, ६५,००० जना (१३,००० घरधुरी) लाई आपत्कालीन वाश सहयोग, आयआर्जन तथा जीविकोपार्जन पुनःप्राप्ति, सुरक्षित आवास र बालबालिकासहित वयस्कका लागि परामर्श तथा मानसिक स्वास्थ्य सेवा विस्तारको खाँचो कायमै रहेको अद्यावधिकमा उल्लेख छ।

स्रोत र साझेदारी

आर्थिक स्रोततर्फ वर्ल्ड भिजन नेपालले राष्ट्रिय आपत्कालीन तयारी तथा प्रतिक्रिया कोष (एनईपीआरएफ) बाट अमेरिकी डलर १ लाख जारी गरेको छ। अस्ट्रेलियाली मानवीय साझेदारी (एएचपी–डीएफएटी) बाट १० लाख अस्ट्रेलियाली डलर (करिब ६,५५,००० अमेरिकी डलर) को सहयोग स्वीकृत भएको छ। साथै ताइवान, सिंगापुर, कोरिया, अस्ट्रेलिया, बेलायत, अमेरिका, न्युजिल्यान्ड, स्विट्जरल्यान्ड, फ्रान्स, जापान र स्पेनका वर्ल्ड भिजन सहयोग कार्यालयहरूले जम्मा २५,६०,७९९ अमेरिकी डलर उपलब्ध गराएका छन्।

प्रभावित जिल्लाहरू संस्थाको हालको कार्यक्षेत्रभन्दा बाहिर पर्ने भए पनि सन् २०१५ को भूकम्प प्रतिकार्यबाट यी क्षेत्रमा कामको अनुभव रहेको संस्थाले जनाएको छ। राहत वितरण स्थानीय साझेदार संस्था किर्डार्क नेपाल र गुड नेबर्स नेपाल (जीएनएन) मार्फत हुनेछ, जसले राष्ट्रिय नियमको पालनासँगै स्थानीय नेतृत्वमा हुने आपत्कालीन प्रतिकार्यलाई बलियो बनाउने संस्थाको भनाइ छ। क्लस्टर तथा अन्तर–निकाय संयन्त्रमार्फत समन्वय गरी दोहोरोपन हटाउने प्रयास पनि भइरहेको छ।

फराकिलो क्षेत्रमा असर

बाढीको असर भोटेकोशी–त्रिशूली नदी प्रणालीको फराकिलो करिडोरमा देखिएको छ। रसुवा, नुवाकोट, धादिङ, गोरखा, चितवन, तनहुँ, मकवानपुर, नवलपरासी पूर्व र नवलपरासी पश्चिम गरी नौ जिल्ला यो करिडोरमा पर्ने अद्यावधिकमा उल्लेख छ।

सरकारी उद्धार अझै जारी रहेको यस घडीमा राहतदेखि पुनर्निर्माणसम्म सरकार, स्थानीय तह र सहयोगी संस्थाहरूबीचको समन्वय नै पीडित परिवारको पुनःस्थापनाको मुख्य आधार बन्ने देखिन्छ।

खबरपाटी