१४ बुँदे सहमतिपछि पुल्चोकमा धर्नारत लघुवित्त ऋणीहरू घर फर्किए

काठमाडौँ - नेपाल सरकारसँग १४ बुँदे सहमति भएपछि ललितपुरको पुल्चोकस्थित राष्ट्रिय मानव अधिकार आयोगको कार्यालय बाहिर धर्नामा बसेका लघुवित्त ऋणीहरू आ-आफ्नो घर फर्किएका छन्।

नेपाल सरकार र ऋणी प्रतिनिधिहरूबीच हिजो भदौ ६ गते भएको वार्तामा १४ बुँदे सहमति भएपछि धर्ना कार्यक्रम स्थगित गरिएको हो।

सहमति पश्चात् आज बिहान ८:५० बजेदेखि सरकारले साझा यातायातका बसहरूको व्यवस्था गरी धर्नामा सहभागी ऋणीहरूलाई गन्तव्यतर्फ पठाएको छ।

विभिन्न सरकारी निकायका अधिकारीहरूको उपस्थितिमा ३२३ जना ऋणीलाई ८ वटा बसमार्फत बिदाइ गरिएको हो।

झापा, मोरङ, सर्लाही, महोत्तरी, सिन्धुली, बारा, पर्सा र नवलपरासी लगायतका जिल्लाबाट आएका ऋणीहरूलाई आ-आफ्नो क्षेत्रतर्फ पठाइएको छ।

सरकारसँग भएको सहमतिपछि लामो समयदेखि जारी धर्ना कार्यक्रम स्थगित भएको छ।

खबरपाटी