डब्लुकेएफ कराते सिरिज वानमा पदक विजेता एरिका गुरुङलाई सम्मान

काठमाडौँ - नेपाल सितोरियो कराँते संघले मलेसियामा सम्पन्न डब्लुकेएफ कराते सिरिज वानमा पदक विजेता एरिका गुरुङलाई सम्मान गरेको छ।​

त्रिपुरेश्वरस्थित नेपाल खेलकुद पत्रकार मञ्च (एनएसजेएफ) मा मंगलवार सितोरियो संघले पत्रकार सम्मेलनमार्फत गर्दै अन्ताराष्ट्रिय पदक विजेता एरिकालाई नगदसहित सम्मान गरेको हो।

नेपाल कराँते महासंघका अध्यक्ष युवराज लामा, महासंघका उपाध्यक्षद्वय देव लामा र मझेन्द्र सिंह र महासंघका महासचिव दावा लामाले एरिकालाई नगद एक लाख र उनका प्रशिक्षक कुशल श्रेष्ठलाई ५० हजार सम्मानपत्रसहित सम्मान गर्‍यो।​

एरिकाले मलेसियामा भएको डब्लुकेएफ कराते सिरिज वानमा ६८ केजी तौलसमूहमा स्वर्ण पदक जितेकी थिइन्। नेपालले पहिलोपल्ट सिरिज वान पदक जितेको हो।

उक्त अवसरमा संघले इजिप्टमा हुने विश्व कराते च्याम्पियनसिपमा छनोट भएकी सानुमाया थिङ र प्रशिक्षक मण्डेकाजी श्रेष्ठलाई पनि खादा लगाएर सम्मान गरिएको थियो।

कार्यक्रममा नेपाल कराते महासंघका अध्यक्ष युवराज लामाले भविष्यमा पनि अन्ताराष्ट्रिय पदक ल्याइरहने वातावरण सिर्जना गर्न प्रशिक्षकहरूले आफूलाई अपडेट गर्दै लैजानुपर्ने बताए।

पुरानै स्थितिबाट आफूलाई तयार गरेर प्रतियोगितामा प्रतिस्पर्धा गर्ने हो पदक ल्याउन सहज नहुने लामाले धारणा राखे। प्रशिक्षक कुशल श्रेष्ठले खेलाडीको सफलतामा सम्मानले उनीहरूमा ठूलो प्रोत्साहन मिल्ने बताए।​

एरिकाले सबै नकारात्मक पक्ष बिर्सिएर आगामी विश्व च्याम्पियनसिपका लागि तयार रहेको बताइन्। विश्व कराँतेमा नेपालप्रति पनि राम्रो छाप बस्दै गएको एरिकाले उल्लेख गरिन्।

खबरपाटी