रुसको युक्रेनमाथि अहिलेसम्मकै दोस्रो ठूलो हवाई आक्रमण, २१ जनाको मृत्यु

रुसले युक्रेनमाथि अहिलेसम्मकै दोस्रो ठूलो हवाई आक्रमण गरेको छ, जसमा २१ जनाको मृत्यु भएको छ ।

यो आक्रमण बिहीबार राति राजधानी किभमा भएको हो । यस आक्रमणमा युरोपियन युनियन (ईयू) र बेलायती काउन्सिलका भवनहरूमा समेत क्षति पुगेको छ ।

किभ शहरको सैन्य प्रशासन प्रमुख तिमुर ट्काचेनको अनुसार मृतकमध्ये २, १४ र १७ वर्षका बालबालिकाहरू पनि छन् । रूसले एकै रातमा युक्रेनमाथि ६२९ हवाई हमला हतियारहरू प्रहार गरेको युक्रेनको हवाई सेनाले जनाएको छ, जसमा ५९८ ड्रोन र ३१ मिसाइल समावेश थिए ।

हवाई सेनाका सञ्चार प्रमुख युरी इह्नातले सीएनएनसँग भने, ‘यो हमलालाई युक्रेनमाथि अहिलेसम्म गरिएका सबैभन्दा ठूला संयुक्त आक्रमणहरूमध्ये एक मान्न सकिन्छ ।’

सैन्य-उद्योग प्रतिष्ठानहरू र युक्रेनका सैन्य एयर बेसहरूमाथि उच्चप्रविधियुक्त हतियार प्रयोग गरेर आक्रमण गरिएको रूसको रक्षा मन्त्रालयले जनाएको छ । रुसले यो अभियान अझै जारी रहने बताएको छ ।

त्यसैबीच युक्रेनी राष्ट्रपति भोलोदिमिर जेलेन्स्कीले यो आक्रमणलाई सामान्य नागरिकहरूको भयानक र योजनाबद्ध हत्या भन्दै निन्दा गरेका छन् । उनले एक्समा लेखेका छन्, ‘यी रुसी मिसाइलहरू र ड्रोन आक्रमणहरू उनी सबैका लागि स्पष्ट सन्देश हुन्, जो हप्ता र महिनौंदेखि युद्धविराम र कूटनीतिक समाधानको माग गर्दै आएका छन् ।’

युक्रेनी अधिकारीहरूले बताएअनुसार सयौं आपतकालीन उद्धारकर्मीहरू विभिन्न स्थानहरूमा पठाइएको छ, जसमा ईयू मिसनको प्रयोगमा रहेको भवन पनि समावेश छ ।

खबरपाटी