निर्देशक निर्मल पौडेलको ‘निलो आकाश’ निफको प्रमुख आकर्षण

काठमाडौं । निर्देशक निर्मल पौडेलको नवीनतम कृति ‘निलो आकाश’ नेपाल अन्तर्राष्ट्रिय चलचित्र महोत्सव (निफ) को प्रमुख आकर्षणमध्ये एक बन्ने अपेक्षा गरिएको छ। मधेसको महिलाको कथालाई केन्द्रमा राखेर निर्माण गरिएको यो लघु चलचित्र आगामी चैत्र ९ गते बिहान ११ बजे छायाँ सेन्टरमा प्रिमियर हुने छ।

निर्देशक पौडेलले नेपाली समाजको यथार्थ चित्रण गर्न ‘निलो आकाश’ लाई एउटा महत्वपूर्ण माध्यम बनाएका छन्। उनका अनुसार, यो चलचित्र समाजमा रहेका महिलाका भोगाइ र संघर्षलाई अन्तर्राष्ट्रिय मञ्चमा उजागर गर्ने एउटा प्रयास हो। यसअघि उनले निर्देशन गरेको सर्ट फिल्म ‘म कमरेड’ अन्तर्राष्ट्रिय महोत्सवहरूमा प्रदर्शन भइसकेको थियो भने राष्ट्रिय लघु चलचित्र प्रतियोगितामा तेस्रो स्थान हासिल गरेको थियो।

‘निलो आकाश’ का निर्माता आस्था शर्मा, तेजु पाण्डे र गणेश कन्चन भारती रहेका छन् भने अभिनेत्री निकिता चांडक मुख्य भूमिकामा देखिनेछिन्। काफिया मिडिया र निर्मल पिक्चर्सको ब्यानरमा बनेको यो चलचित्र दर्शकहरूका लागि प्रेरणादायी हुने विश्वास गरिएको छ। महोत्सवमा सहभागी हुन चाहने दर्शकहरूले खल्ती एपमार्फत टिकट बुकिङ गर्न सक्नेछन्।

निफमा विश्वभरका ४० देशका ८७ वटा चलचित्रहरू प्रदर्शन गरिँदैछन्, जसमा बुसान, कान्स, लोकार्नो, बर्लिनजस्ता प्रतिष्ठित महोत्सवहरूमा देखाइएका चलचित्रहरू समेत छन्। महोत्सवको निर्णायक मण्डलमा निर्देशक दीपेन्द्र गौचन, अभिनेत्री सुरक्षा पन्त, सम्पादक रक्षा सिंह राणा, समीक्षक रिता दत्ता, निर्देशक लिउ जियान र कलाकार जमल शाह रहेका छन्।

निफको अन्तिम दिन चैत्र ११ गते संचार तथा सूचना प्रविधि मन्त्री पृथ्वी सुब्बा गुरुङको प्रमुख आतिथ्यमा अवार्ड वितरण समारोह सम्पन्न हुनेछ। नेपाली प्रतिस्पर्धामा उत्कृष्ट फिचर फिल्मलाई एक लाख नगदसहित ट्रफी, उत्कृष्ट सर्ट फिल्म र वृत्तचित्रलाई ५०-५० हजार नगदसहित ट्रफी प्रदान गरिनेछ। निर्देशक निर्मल पौडेलको मेहनत र समर्पणले ‘निलो आकाश’ अन्तर्राष्ट्रिय फेस्टिभलहरूमा पनि आफ्नो प्रभाव पार्ने अपेक्षा गरिएको छ।

खबरपाटी