आर्थिक संकट पार लाउने उपाय खाेज्न प्रधानमन्त्रीले आज निजी क्षेत्रसँग छलफल गर्दै

मुलुकको अर्थतन्त्रलाई सुधार गर्ने के गर्ने भन्नेबारे सरकारले आज निजी क्षेत्रसँग सुझाव लिँदैछ । प्रधानमन्त्री पुष्पकमल दाहाल प्रचण्डले आज निजीक्षेत्रका प्रतिनिधिसँग छलफल गर्ने प्रधानमन्त्रीको सचिवालयले जनाएको छ ।

उद्योगी, व्यवसायीहरूको चिन्ताको विषयमा प्रधानमन्त्रीले उनीहरूलाई आस्वस्त पार्ने प्रयास गर्ने बताइएकाे छ । क्षेत्रगत छलफलपछि प्रधानमन्त्रीले सत्ता साझेदार दल र विपक्षी दलहरूसँग पनि छलफल गर्ने तयारी गरेका छन् । 

देशको आर्थिक अवस्था नसुर्धेपछि तनावमा परेका प्रधानमन्त्री दाहालले यो संकटबाट पार पाउन निरन्तर छलफल चलाइरहेका छन् । उनले सोमबार विभिन्न विषयगत मन्त्रालय, राष्ट्रिय योजना आयोग, नेपाल राष्ट्र बैंकलगायत निकायसँग छलफल गरेका थिए । 

बाह्य आर्थिक सूचाकांकहरू सकारात्मक देखिए पनि आन्तरिक सूचाकांक नकारात्मक छन् । मुख्य समस्या उत्पादनमा कमी, लगानीकर्ता र उपभोक्ताको मनोविज्ञानमा देखिएको कमजोर आत्मविश्वासले अर्थतन्त्र चलायमान हुन सकेको छैन ।

निजीक्षेत्र र उपभोक्ताको मनोबल बढाउने गरी सरकारले आवश्यक कदम चाल्नुपर्ने अवस्था छ ।  प्रधानमन्त्रीले आर्थिक संकटबारे दलहरूसँग पनि छलफल गर्ने यसअघि नै बताएका थिए । त्यसअघि उनले क्षेत्रगत रूपमा छलफल गरी आवश्यक रणनीति बनाउन लागेका हुन् । 

खबरपाटी