महान्यायाधिवक्ताको निर्णय बदर माग गर्दै रवि लामिछानेविरुद्ध सर्वोच्चमा रिट दायर

काठमाडौं । महान्यायाधिवक्ता दीनमणि पोखरेलले राष्ट्रिय स्वतन्त्र पार्टीका सभापति रवि लामिछानेविरुद्ध दोहोरो राहदानीसम्बन्धी कसुरमा मुद्दा नचलाउने निर्णय बदर गर्न माग गर्दै सर्वोच्च अदालतमा रिट निवेदन परेको छ । सिन्धुलीका युवराज पौडैल सफलले आइतबार सर्वोच्चमा रिट दायर गरेका हुन्।

रिट निवेदनमा उत्प्रेषण, परमादेशलगायत जे–जो चाहिने उपयुक्त आज्ञा आदेश जारी गरी पाऊँ भनी माग गरिएको छ । मुद्दा नचलाउने निर्णय गरेको भन्दै महान्यायाधिवक्ताको कार्यालयलाई विपक्षी बनाइएको छ । सर्वोच्चले उक्त रिट अध्ययन गरिरहेको र केही दिनमा सम्पर्क गर्न भनेको रिट निवेदक युवराज सफलको भनाइ छ ।

रविविरुद्ध यसअघि प्रहरीले यही कसुरमा अनुसन्धान गरेको थियो । तर, प्रहरी र सरकारी वकिल कार्यालयले मुद्दा नचलाउने निर्णय गरेका थिए । आफूविरुद्ध मुद्दा नचल्ने भएपछि रवि आगामी वैशाख १० गते हुने चितवन २ को निर्वाचनमा उम्मेदवार बन्ने भएका छन् । रविले सरकारलाई विश्वासको मत दिएर दोहोरो राहदानी प्रकरण सामसुम बनाएको आशंका गरिएको छ । तर उनले आफूले कोहीसँग सम्झौता नगरेको दाबी गरेका छन् ।

खबरपाटी