तीन ठूला नदीमा पानीको बहाव सतर्कता तह पार, तल्लो तटीय क्षेत्रमा सावधानी अपनाउन आग्रह

काठमाडौं – देशका विभिन्न भागमा भइरहेको वर्षासँगै ठूला नदीहरूमा पानीको बहाव बढेर सतर्कता तह पार गरेको छ।

जल तथा मौसम विज्ञान विभाग, बाढी पूर्वानुमान महाशाखाका अनुसार आज बिहान ६ बजेको मापनमा सुनकोशी, बुढीगण्डकी र महाकाली नदीले सतर्कता तह पार गरेका हुन्। 

सुनकोशी नदीको खुर्कोट, सिन्धुलीमा जलसतह ७.६२ मिटर पुगेको छ। यस नदीमा ७.५ मिटरलाई सतर्कता तह मानिन्छ। हाल यहाँ पानीको बहाव स्थिर रहेको छ। गोरखाको बुढीगण्डकी नदी आरुघाट–गोरखा केन्द्रमा जलसतह ३.६ मिटर पुगेको छ, जबकि यहाँको सतर्कता तह ३.५ मिटर हो। यद्यपि, यहाँ पानीकोस्तर विस्तारै घट्दो क्रममा देखिएको छ।

त्यसैगरी महाकाली नदी पारीगाउँ–डडेलधुरामा पनि जलसतह ६.३७ मिटर पुगेर सतर्कता तह (५.८ मिटर) पार गरेको छ। यहाँ पानीको बहाव अहिले स्थिर छ।

नदीहरूमा पानीको सतह बढेर चेतावनीको तहमा पुगेकाले बाढी पूर्वानुमान महाशाखाले ती नदीका तल्लो तटीय क्षेत्रमा बसोबास गर्ने बासिन्दाहरूलाई विशेष सावधानी अपनाउन अनुरोध गरेको छ।

बाढीको जोखिम कायमै रहने सम्भावना रहेकाले नदी किनारका क्षेत्रमा रहेका सर्वसाधारणलाई सतर्क रहन र सुरक्षित स्थानको पहिचान गरिराख्न प्रशासनले आग्रह गरेको छ।

खबरपाटी