तिब्बतमा पुनः ड्याम फुट्यो, उद्धारकर्मी र सर्वसाधारणलाई तत्काल सुरक्षित स्थान जान आग्रह

काठमाडौं - चीनको तिब्बतमा पुनः पानीको ड्याम फुटेको छ । ड्याम फुट्दा फेरि बाढी आएको नेपाल प्रहरीले जनाएको छ ।

“तिब्बततर्फ पानीको ड्याम पुनः फुटेको जानकारी प्राप्त भएको हुँदा उद्धार तथा राहत कार्यमा खटिनुभएका सम्पूर्ण सुरक्षाकर्मी, उद्धारकर्मी तथा सर्वसाधरणहरूलाई तत्काल सतर्क रहन र सुरक्षित स्थानतर्फ जान/जानकारी गराउन अनुरोध छ,” नेपाल प्रहरीले शुक्रबार बिहान जारी गरेको सूचनामा भनिएको छ । 

यही भदौ १० गते बिहान तिब्बततर्फबाट रसुवाको भोटेकोसी हुँदै नुवाकोटको त्रिशूली नदीमा भीषण बाढी आएको थियो । बाढीले रसुवा, नुवाकोटलगायत जिल्लामा ठूलो जनधनको क्षति गरेको छ ।

अहिले ठूलो संख्यामा उद्धारकर्मी बाढी प्रभावित क्षेत्रमा खटिएका छन् । तिब्बतमा पुनः पानीको ड्याम फुटेर बाढी नेपालतर्फ बढेपछि उद्धारमा खटिएका सुरक्षाकर्मी, उद्धारकर्मी र सर्वसाधारणलाई तुरुन्त सुरक्षित स्थानामा जान भनिएको हो ।

खबरपाटी