परराष्ट्रमन्त्री शिशिर खनाल आज चीन भ्रमणमा जाँदै

काठमाण्डौ – परराष्ट्रमन्त्री शिशिर खनाल आज चीन भ्रमणमा जाँदै हुनुहुन्छ । हालै भारतको तीन दिने भ्रमण सकेर फर्किएका मन्त्री खनाल चार दिने भ्रमणका लागि आज चीन जान लाग्नुभएको हो । 

परराष्ट्र मन्त्रालयका अनुसार चीनका विदेशमन्त्री वाङ यीको निमन्त्रणामा मन्त्री खनाल चीन जान लाग्नुभएको हो । मन्त्रालयकाअनुसार मन्त्री खनालले बेइजिङमा भोलि आफ्ना चिनियाँ समकक्षी वाङ यीसँग द्विपक्षीय वार्ता गर्नुहुनेछ । साथै नेपाल–चीन सम्बन्धलाई अझ सुदृढ पार्न र आपसी सहयोगलाई अगाडि बढाउने पारस्परिक हितका विषयमा छलफल केन्द्रित हुनेछ । 

मन्त्री खनालले चीनका उच्चस्तरीय विशिष्ट व्यक्तिसँग पनि भेट गर्नुहुनेछ । भ्रमणको क्रममा मन्त्री खनालले नेपालमा विदेशी लगानी प्रवर्द्धन गर्न बेइजिङमा रहेको नेपाली दूतावासले आयोजना गर्ने लगानी सम्मेलनमा भाग लिनुहुनेछ । उहाँले चिनियाँ व्यापारिक समुदायसँग अन्तरक्रिया गर्नुहुनेछ । परराष्ट्रमन्त्री खनालको सम्मानमा नेपाली दूतावासले आयोजना गर्ने स्वागत समारोहमा पनि सहभागी हुनुहुनेछ र नेपाली समुदायसँग अन्तरक्रिया गर्नुहुने मन्त्रालयले जानकारी दिएको छ । 

मन्त्री खनाल असार ३ गते स्वदेश फर्कनुहुनेछ । यसअघि मन्त्री खनालले गएको जेठ २२ देखि २४ गतेसम्म तीन दिन भारत भ्रमण गर्नुभएको थियो । नेपाली भूमि लिपुलेक क्षेत्रबाट भारत र चीनले व्यापारिक मार्ग खोलेको विषय चीन भ्रमणका बेला नेपालको तर्फबाट एजेण्डा बन्न सक्ने अनुमान गरिएको छ ।

खबरपाटी