‘विपद् व्यवस्थापन स्थानीय सरकारको प्रमुख दायित्व’ : गगन थापा

काठमाडौँ – नेपाली कांग्रेसले आफ्ना नेतृत्वमा रहेका स्थानीय र प्रदेश सरकारहरूलाई विपद् व्यवस्थापनको क्षेत्रमा विशेष प्राथमिकताका साथ कार्य गर्न निर्देशन दिएको छ।

शुक्रवार पार्टी केन्द्रीय कार्यालय सानेपामा आयोजित एक कार्यक्रममा बोल्दै पार्टी सभापति गगनकुमार थापाले यस्तो निर्देशन दिएका हुन्।

स्थानीय सरकारले सम्पादन गर्नुपर्ने मुख्य कार्यहरूमध्ये विपद् व्यवस्थापनलाई प्राथमिकतामा राख्दै उनले पार्टीले विशेष मार्गनिर्देशन प्रदान गरेको जानकारी दिए। 

उनकाअनुसार स्थानीय तहले विपद् व्यवस्थापनका सन्दर्भमा निर्वाह गर्नुपर्ने भूमिका र गर्नुपर्ने कामहरूलाई स्पष्ट रूपमा वर्गीकरण गरी सोही बमोजिम अगाडि बढ्न आग्रह गरे।

पार्टीको सांगठनिक सुदृढीकरण र सदस्यता वितरणको सन्दर्भमा चर्चा गर्दै सभापति थापाले नेपाली कांग्रेस मुलुककै सबैभन्दा ठूलो सामाजिक संस्थाको रूपमा रहेको उल्लेख गरे।

पार्टीको यो विशाल सञ्जाललाई विपद् जोखिम न्यूनीकरण र सचेतनाका लागि परिचालन गरिने लक्ष्य राखिएको उनले बताए।

खबरपाटी