रास्वपाको प्रदेश अधिवेशन आजदेखि

काठमाडौं – राष्ट्रिय स्वतन्त्र पार्टी रास्वपाले प्रथम राष्ट्रिय महाधिवेशनको तयारी स्वरूप सुरु गरेको जिल्ला अधिवेशन ५६ जिल्लामा सम्पन्न गरेको छ। 

देशभरका ७७ जिल्लामध्ये बाँकी १२ जिल्लामा विविध कारणवश रोकिएको निर्वाचन प्रक्रिया अगाडि बढाउने तयारी भइरहेको रास्वपाले जनाएको छ।

रास्वपा केन्द्रीय निर्वाचन विभागका प्रमुख भुवन केसीले १२ जिल्लामा निर्वाचन प्रक्रिया जारी रहेको र एक जिल्लामा अधिवेशन स्थगित भएको तथा पाँच जिल्लामा अझै अधिवेशन हुन बाँकी रहेको जानकारी दिए।  

रास्वपाले पहिलो महाधिवेशनको तयारी स्वरूप जेठ २३ गतेदेखि देशभर जिल्ला अधिवेशन सुरु गरेको थियो। पार्टीको केन्द्रीय कार्यतालिका अनुसार जिल्ला अधिवेशन सकिएलगत्तै मङ्गलबारदेखि सातै प्रदेशमा प्रदेश अधिवेशन सुरु हुँदै छ।

रास्वपाका प्रवक्ता मनीष झाका अनुसार हालसम्म सम्पन्न भएका ५६ जिल्ला अधिवेशनबाट अधिकांश जिल्लामा नयाँ नेतृत्व चयन भइसकेको छ भने केही जिल्लामा निर्वाचन प्रक्रिया अन्तिम चरणमा पुगेको छ। मधेश प्रदेशका अधिकांश जिल्लामा नेतृत्व चयनका लागि मतदान प्रक्रिया चलिरहेको पनि उहाँले जानकारी दिए। 

कोशी प्रदेशका झापा, मोरङ, सुनसरी, इलाम, तेह्रथुम, धनकुटा, भोजपुर, सङ्खुवासभा, पाँचथर, ताप्लेजुङ, सोलुखुम्बु, खोटाङ र ओखलढुङ्गामा अधिवेशन सम्पन्न भएको छ। उदयपुरमा निर्वाचन प्रक्रिया जारी छ।

त्यसै गरी मधेश प्रदेशका महोत्तरी, रौतहट, सिराहा, पर्सा र सर्लाहीमा निर्वाचन सम्पन्न भएको छ। 

धनुषामा आज निर्वाचन हुँदै छ। त्यसै गरी सप्तरी र बारामा भोलि बुधबार मतदान हुने कार्यतालिका छ। यसै गरी अन्य जिल्लामा पनि नेतृत्व चयनको प्रक्रिया अघि बढिरहेको रास्वपाले जनाएको छ। 

बागमती प्रदेशका काठमाडौँ, भक्तपुर, काभ्रेपलाञ्चोक, नुवाकोट, मकवानपुर, दोलखा, सिन्धुली, धादिङ, रामेछाप, चितवन, रसुवा र ललितपुरमा अधिवेशन सम्पन्न भएको छ। सिन्धुपाल्चोकको अधिवेशन भने स्थगित गरिएको छ। 

गण्डकी प्रदेशका स्याङ्जा, कास्की, पर्वत, लमजुङ, म्याग्दी, तनहुँ, गोरखा र बाग्लुङमा अधिवेशन सम्पन्न भएका छन्। बाग्लुङ र नवलपुरमा भने निर्वाचन प्रक्रिया सुरु हुन बाँकी छ।

यसै गरी लुम्बिनी प्रदेशका सबै जिल्लामा अधिवेशन सम्पन्न भएको रास्वपाले जनाएको छ।

कर्णाली प्रदेशका कालिकोट, सल्यान, रुकुम पश्चिम, मुगु र जुम्लामा अधिवेशन सम्पन्न भइसकेको छ । सुर्खेत, जाजरकोट र दैलेखमा निर्वाचन प्रक्रिया जारी छ। 

सुदूरपश्चिम प्रदेशका बैतडी, डडेलधुरा, अछाम, दार्चुला, कैलाली र कञ्चनपुरमा अधिवेशन सम्पन्न भएको छ। डोटी र बाजुरामा पुनः निर्वाचन हुने भएको छ भने अन्य जिल्लामा नेतृत्व चयन सम्पन्न भइसकेको छ। 

रास्वपाले पहिलो महाधिवेशन आगामी असार ६ र ७ गते चितवनमा गर्ने तालिका सार्वजनिक गरेको छ। 

खबरपाटी