चुनाव सकियो, अब देश बनाउने पालो

प्रस्तुत काेइराला । काठमाडौं । मतदान सम्पन्न भइसकेको छ। देश अहिले नयाँ जनादेशको प्रतीक्षामा छ। केही हप्ता यता राजनीतिक बहस, प्रतिस्पर्धा, आरोप–प्रत्यारोप र चुनावी उत्साहले समाजलाई अनेक धारमा विभाजित गरेको थियो। तर लोकतन्त्रको सौन्दर्य नै यही हो निर्णय अन्ततः जनताको हातमा हुन्छ। अब मतपेटिकाभित्र परेको जनमतले देशको आगामी राजनीतिक दिशा तय गर्नेछ। चुनाव सकिएको यस क्षणमा अब प्रश्न प्रतिस्पर्धाको होइन, जनादेशलाई सम्मान गर्ने राष्ट्रिय परिपक्वताको हो।

यसपटकको निर्वाचनलाई शान्तिपूर्ण र व्यवस्थित बनाउन राज्यका विभिन्न निकायहरूले निर्वाह गरेको भूमिकालाई पनि देशले स्मरण गर्नैपर्छ। संवैधानिक जिम्मेवारी सम्हाल्दै नेतृत्व गरेको सुशीला कार्की नेतृत्वको मन्त्रिपरिषद्, देशभर सुरक्षा व्यवस्थापनलाई प्रभावकारी बनाउने गृहमन्त्री ओम प्रकाश अर्यालको संयोजन, र निर्वाचनको प्रशासनिक तथा आर्थिक प्रक्रियालाई अवरोधविना अघि बढाउन भूमिका खेलेका अर्थमन्त्री रामेश्वर खनालको बजेट व्यवस्थापन यी सबै प्रयासहरूले लोकतान्त्रिक प्रक्रियालाई सफल बनाउन योगदान दिएका छन्। लोकतन्त्र केवल मतपत्रमा सीमित हुँदैन; यसलाई सफल बनाउन राज्य संयन्त्रको संयम, अनुशासन र समन्वय उत्तिकै आवश्यक हुन्छ।

चुनावको मैदानमा विचार र एजेन्डाहरू फरक–फरक हुन सक्छन्। दलहरूबीच प्रतिस्पर्धा हुनु लोकतन्त्रको सामान्य अभ्यास हो। तर मतदान सकिएपछि त्यो प्रतिस्पर्धा राष्ट्रिय एकताको भावनामा रूपान्तरण हुनुपर्छ। चुनावअघि हामी दल, विचार र नेताका आधारमा विभाजित भयौँ होला; तर अब परिणाम जे आए पनि हामी सबै एउटै देशका नागरिक हौँ। लोकतन्त्रको परिपक्वता यहीँ देखिन्छ परिणाम आफ्नो पक्षमा आए पनि, नआए पनि, जनताको निर्णयलाई स्वीकार गर्ने क्षमतामा।

आज नेपाललाई सबैभन्दा आवश्यक कुरा राजनीतिक जित–हारको बहस होइन, राष्ट्र निर्माणको साझा प्रतिबद्धता हो। चुनावी अभियानका क्रममा समाजमा देखिएको कटुता, आरोप र विभाजनलाई अब त्यहीँ छाडेर अगाडि बढ्नुपर्छ। कसैले जिते पनि त्यो जित केवल एउटा दलको होइन त्यो जनताको निर्णय हो। र कसैले हारे पनि त्यो हार अन्तिम सत्य होइन लोकतन्त्रमा जनतासँग पुनः विश्वास जित्ने अवसर सधैँ खुला हुन्छ।

अबको समय एकअर्काको खुट्टा तान्ने, आरोप लगाउने वा पराजयको पीडालाई समाजमा फैलाउने होइन। अबको समय एक–अर्काको हात समातेर देश बनाउने हो। विकास, सुशासन, रोजगारी, शिक्षा र समृद्धिको सपना कुनै दलको एकल एजेन्डा हुन सक्दैन; यो सम्पूर्ण राष्ट्रको साझा लक्ष्य हो। त्यसैले चुनावी विभाजनलाई अब राष्ट्रिय एकतामा रूपान्तरण गर्नु हाम्रो सामूहिक जिम्मेवारी हो।

नेपाल सानो देश भए पनि यसको सम्भावना ठूलो छ। हिमाल, पहाड र तराईको विविधता, युवा जनशक्ति, सांस्कृतिक सम्पदा र लोकतान्त्रिक अभ्यास यी सबै हाम्रो शक्ति हुन्। तर यी शक्तिहरूलाई परिणाममा बदल्न एकता आवश्यक छ। राजनीतिक प्रतिस्पर्धा लोकतन्त्रको आधार हो, तर राष्ट्रिय एकता त्यसको आत्मा हो।

यसकारण आजको सन्देश स्पष्ट छ जनादेश जसको पक्षमा आए पनि त्यो नेपालकै पक्षमा हो। चुनाव सकिएको छ; अब विवाद होइन, विश्वासको समय हो। मतपेटिकाबाट निस्कने निर्णयलाई सम्मान गर्दै अब हामी सबैले एउटै आवाजमा भन्नुपर्ने बेला आएको छ:

अब हामी केवल दलका समर्थक होइनौँ हामी नेपाली हौँ।
र नेपाल बनाउने जिम्मेवारी पनि हाम्रो साझा हो।

खबरपाटी