साताको पहिलो दिन नेप्से २० अंकले घट्यो, कारोबारमा पनि गिरावट

साताको पहिलो कारोबार दिन आइतबार शेयरबजार परिसूचक नेप्सेमा झण्डै २० अंकको गिरावट आएको छ । नेपाल स्टक एक्सचेञ्जका अनुसार आज नेप्से सूचक १९.८५ अंकले घट्दै २ हजार ६९४.२० बिन्दुमा झरेको हो । 

अघिल्लो साताको अन्तिम कारोबार दिन बिहीबार नेप्से सूचक १७ अंकमाथिले घटेर बन्द भएको थियो ।

आज नेप्से सूचकसँगै कारोबार पनि घटेको छ । गत बिहीबार १४ अर्ब ५६ करोड ३१ लाख रुपैयाँ बराबरको शेयर कारोबार हुँदा आज कारोबार घट्दै ९ अर्ब १० करोड ९४ लाख रुपैयाँ बराबरको २ करोड २० लाख ६० हजार कित्ता शेयर दोस्रो बजारमा किनबेच भएको छ । 

आज ट्रेडिङ समूहको उपसूचक बाहेक अरु १२ वटा उपसूचक ऋणात्मक भएका छन् । सबैभन्दा बढी होटल तथा पर्यटन समूहको उपसूचक १.७५ प्रतिशतले घटेको छ भने हाइड्रोपावर समूहको उपसूचक १.३६ प्रतिशतले घट्न पुगेको छ । 

अरु समूहको उपसूचक १ प्रतिशतभन्दा कमले घटेका छन् । तथापि, ट्रेडिङ समूहको उपसूचक भने आज ०.५५ प्रतिशतले बढेको छ । २०१ कम्पनीको शेयर मूल्य घटेको छ भने ५० कम्पनीको मूल्य बढेको छ । 
 

खबरपाटी