पशुपति काेटीहाेममा के भएकाे हाे शुक्रबार राति, छानबिन गर्न सात सदस्यीय समिति गठन

पशुपतिनाथ परिसरमा कोटिहोमको नाममा आयोजित कार्यक्रमको समापनको दिन शुक्रबार भएको घटनाको छानबिन गर्न सात सदस्यीय समिति गठन भएको छ ।सुरक्षा समितिका सदस्यहरु र आयोजकबीचको सहमतिपछि काठमाडौंका सहायक प्रमुख जिल्ला अधिकारी माधवप्रसाद ढुंगानाको संयोजकत्वमा छानबिन समिति गठन भएको हो ।समितिले १५ दिनभित्र घटनाबारे प्रतिवेदन पेश गर्नेछ । साथै, घटनाका दोषीलाई कारबाही गर्ने सहमति पनि भएको छ ।

यस्तो छ घटना

पशुपतिनाथ परिसरमा कोटिहोमको नाममा आयोजित कार्यक्रमको समापन दिन, शुक्रबार राति ११ बजे प्रहरी र आयोजक पक्षबीच झडप भएको थियो ।सोधपुछका लागि पुगेका सादा पोशाकका प्रहरीले कार्यक्रम आयोजक विजय भण्डारीसँग केही प्रश्नहरू राख्न खोज्दा, भीडले प्रहरीमाथि हातपात गर्यो, जसले गर्दा स्थिति अराजक बन्यो ।

झडपका क्रममा संलग्न दुई व्यक्तिलाई गौशाला प्रहरीले नियन्त्रणमा लिएको छ । घटनाको बादमा विजय भण्डारीले आफ्ना समर्थकहरूलाई आन्दोलनमा उत्रन आह्वान गरेका छन्। उनले भड्काउपूर्ण अभिव्यक्ति दिँदै भने, “बङ्गलादेशभन्दा बेहाल बनाउँछौँ, मलाई छोएर त देखाउ ।”

यसपछि समर्थकहरूले प्रधानमन्त्री केपी शर्मा ओली र गृहमन्त्री रमेश लेखकविरुद्ध नाराबाजी समेत गरे ।त्यसको केहीबेर भाषण चल्दै गर्दा, पछाडिबाट एक युवाले आयोजकलाई “हिसाबकिताब देऊ” भन्दै आग्रह गरे । उनले हिसाब खोजेको बहानामा आयोजक विजय भण्डारीका समूहका केटाहरूले ती युवालाई घेर्न गए । भीडले ती युवकलाई कुटपिट गरेपछि उनको टाउको र नाकबाट रगत बग्न थाल्यो । पछि उनलाई मञ्चको एक कुनामा सुरक्षित राखियो ।

खबरपाटी