सरकारमा पठाउने मन्त्रीबारे छलफल गर्न कांग्रेसले बोलायो कार्यसम्पादन समितिको बैठक

नेपाली कांग्रेसले सरकारमा पठाउने मन्त्रीबारे छलफल गर्न केन्द्रीय कार्यसम्पादन समितिको बैठक बोलाएको छ । 

पार्टी कार्यालय सानेपामा दिउँसो २ बजे बस्ने गरी कार्यसम्पादन समितिको बैठक बोलाइएको मुख्य सचिव कृष्णप्रसाद पौडेलले जानकारी दिए । बैठकमा एमाले अध्यक्ष केपी शर्मा ओली नेतृत्वमा बन्ने सरकारमा पठाउने मन्त्रीहरूका विषयमा छलफल हुनेछ ।

बैठकमा पछिल्लो राजनीतिक परिस्थितिबारे पनि छलफल तथा समीक्षा पनि हुनेछ । यसअघि शुक्रबार प्रधानमन्त्री पुष्पकमल दाहाल प्रचण्डले प्रतिनिधिसभाबाट विश्वासको मत प्राप्त गर्न नसकेपछि कांग्रेसको समर्थनमा एमाले अध्यक्ष केपी शर्मा ओलीले राष्ट्रपतिसमक्ष प्रधानमन्त्रीका लागि दाबी पेस गरेका थिए । 

राष्ट्रपति रामचन्द्र पौडेलले आइतबार साँझ ५ बजेसम्मको समय दिएर संविधानको धारा ७६ को उपधारा २ अनुसार प्रधानमन्त्री दाबी पेस गर्न आह्वान गरेका थिए । तर, एमाले अध्यक्ष ओलीले शुक्रबार राति नै कांग्रेस सभापति शेरबहादुर देउवालाई साथमै लिएर प्रधानमन्त्रीमा दाबी पेस गरेका थिए ।

कांग्रेस-एमालेबीच १७ असारमा नयाँ सत्ता समीकरणका लागि सहमति भएको थियो । सहमति अनुसार पहिलो चरणमा एमाले अध्यक्ष ओली प्रधानमन्त्री बन्न लागेका हुन् । २ वर्षपछि सरकारको नेतृत्व कांग्रेस सभापति शेरबहादुर देउवाले लिनेछन् । 

खबरपाटी